Historia di tráfiko ta kuminsá ku muhé i hòmbernan kanando distanshanan masha largu, di Bandariba òf Bandabou pa Punda/Otrobanda i vise vèrsa. Despues nos ta konosé e buriku di mondi ku ta mansa i usa komo medio di transporte i karga. Esnan ku mas moda tambe ta usa kabai òf mula. Ta traha garoshi, un mas bunita i grandi ku otro i ta fasilitá e sintamentu i e kantidat di pèrsona i karga ku por keda transportá na mes momento.

Pa un temporada no muchu largu, entre 1884 i 1911 nos tráfiko ta konosé diferente tranvia, sea halá pa mula òf kabai i tranvia di motor. E tranvianan aki tabata kore mas parti di Punda i Otrobanda.

Na 1910 e promé outo ta yega Kòrsou i ya pa 1920 Kòrsou tabatin 200 outo i na 1950 7000 outo. Kòrsou tabata para riba e lista di paisnan ku mas outo, mundialmente.

E baiskel no a hasi masha impreshon na Kòrsou. I den pasado tampoko e bròmfits.

E kantidat di outo a pone ku hopi hende a sali for di e drùk di kayanan di Punda i Otrobanda i bai biba pafo. Esaki a pone ku mester a kuminsá traha kaminda, pa despues amplia esakinan i bini ku bòrchi i lus di tráfiko.